I Nordherad vart det fyrst på 1800-talet bygd opp om lag 20 bruk i statsallmenninga, delvis midt i steinura. Desse bruka berga mange familiar gjennom ei trong tid. No er dei aller fleste av desse bruka fråflytta og står til nedfalls. Berre eitt av dei, Flåten, er i privat eige. Vågå Historielag fekk Flåten i gave fyrst på 80-talet og gjorde med ein gong eit stort arbeid for å redde stugu. Sidan har dessverre både hus og jordveg forfalle.

Historielaget har meir enn nok hus å halde i stand, og styret i laget såg seg om etter einkvan som kunne ta seg betre av Flåten. Styret i Nordheradsprosjektet sa seg interessert. Hausten 2005 skreiv derfor desse to laga under ei avtale som inneber at Nordheradsprosjektet overtek disposisjonsretten over bruket, medan Historielaget framleis er eigar.

Styret for Nordheradsprosjektet har sett seg som mål å restaurere Flåten attende til opphavleg stand. Det gjeld både hus og jordveg. Tanken er å bruke Flåten som ein samlingsplass i grenda, som ei ope ”sjølvstells-hytte” i tilknyting til turstigane i området. Flåten bør også kunne brukast i undervisningssamanheng.

Det er eit stort arbeid å restaurere Flåten. Styret for Nordheradsprosjektet har derfor sett ned ei arbeidsgruppe som skal styre det praktiske arbeidet. Jo Kåre Bakke er leiar for denne gruppa. Dei har førebels sett opp delmål som kan fullførast innafor ein 5-årsperiode. Mykje vil bli gjort med dugnad, men mykje må òg utførast av fagfolk.

Hittil har Flåtgruppa rydda jordet, vølt aurbua under stabburet og sikra taket over vasskjelda i Flåten. ”Næmingane” ved Senter for Bygdekultur  restaurerer stugu.